Azərbaycan Milli Elmlər Akademiyası

Azərbaycanın ilk veb saytı (1995)

ANA SƏHİFƏ  >>  XƏBƏRLƏR  >>  GÖRÜŞLƏR

İnformasiya Texnologiyaları İnstitutu ilə İsveçrə və Litvanın ali məktəbləri arasında əməkdaşlıq perspektivləri müzakirə olunub
21.05.2018 08:21
  • A-
  • A
  • A+

İnformasiya Texnologiyaları İnstitutu ilə İsveçrə və Litvanın ali məktəbləri arasında əməkdaşlıq perspektivləri müzakirə olunub

AMEA-nın İnformasiya Texnologiyaları İnstitutunda Litvanın Vilnüs Universitetinin Riyaziyyat və informatika fakültəsinin nəzdində fəaliyyət göstərən Data Science və Rəqəmsal Texnologiyalar İnstitutunun departament rəhbəri, professor Valentina Dagiene və İsveçrənin Federal Texnologiya İnstitutunun nümayəndəsi Blanka Ottilia ilə görüş keçirilib.

Görüşdə Bakı Dövlət Universitetinin dosenti Ramin Mahmudzadə, institutun böyük elmi işçisi İsmayıl Sadıqov, eləcə də institutun şöbələrinin rəhbərləri iştirak ediblər.

Tədbiri giriş sözü ilə açan AMEA-nın akademik-katibi, institutun direktoru, akademik Rasim Əliquliyev beynəlxalq elmi əməkdaşlıq əlaqələrinin qurulması və möhkəmləndirilməsinin institutun prioritet məsələlərindən olduğunu bildirib. Rəhbərlik etdiyi qurumun fəaliyyət istiqamətləri haqqında qonaqlara məlumat verən alim informasiya texnologiyaları və informasiya cəmiyyətinin müxtəlif istiqamətləri üzrə aparılan elmi-tədqiqatlar, əməkdaşlıq əlaqələrinin inkişafı ilə bağlı görülən işlərdən söz açıb. İnstitutun AzScienceNet elm-kompüter şəbəkəsi vasitəsilə Avropa üzrə bütün elm və təhsil qurumlarına xidmət göstərən nəhəng elektron infrastruktura – GEANT layihəsinə qoşulduğunu söyləyən R.Əliquliyev GEANT Assosiasiyası vasitəsilə ölkəmizin 40-dan çox ölkə ilə əməkdaşlıq əlaqələri qurduğunu diqqətə çatdırıb.

Sonra çıxış edən V.Dagiene fəaliyyət göstərdiyi Vilnüs Universiteti haqqında məlumat verib. Bildirib ki, əsası 1579-cu ildə qoyulmuş universitet Şərqi Avropada ilk ali təhsil məktəbi olub. O, hazırda 23 min tələbənin təhsil aldığı universitetin Data Science və Rəqəmsal Texnologiyalar İnstitutunun informasiya və yüksək texnologiyalar sahəsi üzrə müxtəlif istiqamətlərdə fəaliyyət göstərdiyini qeyd edərək qurumda statistika və ehtimal, əməliyyatların tədqiqi, koqnitiv hesablama, kiber-sosial sistem mühəndisliyi, qlobal optimizasiya, təhsil sistemləri, blokçeyn texnologiyaları, eləcə də təsvir və siqnal analizi üzrə qruplarının mövcud olduğunu söyləyib.

Qonaq kompüter elmləri və proqram mühəndisliyi sahəsində tədqiqatlar apardığını, həmçinin Vilnüsdə orta məktəb şagirdlərini beynəlxalq olimpiada və yarışlara hazırladığını söyləyib.

Sonra çıxış edən İsveçrənin Federal Texnologiya İnstitutunun nümayəndəsi Blanka Ottilia uzun müddətdir ki, Vilnüs Universiteti ilə sıx əməkdaşlıq əlaqələrinin mövcud olduğunu və bu əlaqələrin Azərbaycan elmi müəssisələri ilə yaradılmasında maraqlı olduqlarını söyləyib.

Akademik Rasim Əliquliyev çıxış edərək kadr hazırlığı sahəsində Vilnüs Universiteti və İsveçrənin Federal Texnologiya İnstitutu ilə əməkdaşlıq əlaqələrinin qurulması, gənc kadrların Vilnüs Universitetinə magistratura və doktorantura təhsili alması, Vilnus Universitetinin “Web of Science” siyahısına daxil olan “İnformation in Education” jurnalında məqalələrin nəşri baxımından geniş imkanların açıldığını qeyd edib.

Sonra Bakı Dövlət Universitetinin dosenti Ramin Mahmudzadə çıxış edərək Data Science və Rəqəmsal Texnologiyalar İnstitutu ilə elmi əməkdaşlıq əlaqələrinin qurulmasını yüksək qiymətləndirib, bu qurumla kadr və təcrübə mübadiləsinin aparılmasının məqsədəuyğun olduğunu bildirib.  

İnformatika üzrə beynəlxalq “Bebras” müsabiqəsi haqqında məlumat verən R.Mahmudzadə bu müsabiqənin proqramlaşdırma tələb etmədən hələ aşağı siniflərdən şagirdlərin alqoritmik düşüncəsini qiymətləndirməyə imkan verdiyini vurğulayıb. İnformatika fənninin tədrisi zamanı proqramlaşdırma ilə yanaşı, nəzəri biliklərin aşılanmasının da olduqca vacib olduğunu qeyd edərək “Bebras” müsabiqəsinin Azərbaycan məktəblərində də keçirilməsinin nəzərdə tutulduğunu diqqətə çatdırıb.

Sonda müzakirələr aparılıb, suallar cavablandırılıb. Müzakirələrdə dünya səviyyəsində səmərəli elmi araşdırmaların aparılması və innovativ elmi nəticələrin əldə olunması baxımından bu kimi nüfuzlu elmi qurumlarla əməkdaşlıq əlaqələrinin qurulmasının vacibliyi qeyd olunub.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.

  • Paylaş: