Fevralın 22-də görkəmli filosof, tanınmış alim və ictimai xadim, “Şöhrət” ordenli, AMEA-nın müxbir üzvü, professor Səlahəddin Sədrəddin oğlu Xəlilovun 65 yaşı tamam olur.
Səlahəddin Xəlilov 22 fevral 1952-ci ildə Borçalı mahalının Sarvan qəsəbəsində anadan olmuşdur. 1973-cü ildə Azərbaycan Dövlət Universitetinin (indiki BDU) fizika fakültəsini fərqlənmə diplomu ilə bitirmiş, təyinat üzrə həmin universitetin molekulyar fizika kafedrasında saxlanılmışdır.
O, 1976-cı ildə fəlsəfə üzrə fəlsəfə doktoru, 1990-cı ildə fəlsəfə üzrə elmlər doktoru elmi dərəcələrini almış, 2007-ci ildə AMEA-nın müxbir üzvü seçilmişdir.
2007-ci ildə Azərbaycan Dövlət Pedaqoji Universitetində fəlsəfə kafedrasının müdiri vəzifəsində çalışmışdır.
Alim 1991-ci ildə Azərbaycanda özəl təhsil sisteminin əsasını qoymuş, ilk ingilisdilli özəl gimnaziya, humanitar liseyi və Azərbaycan Universitetini təsis etmişdir.
Professor S.Xəlilov fəlsəfədə yeni istiqamətlərdən biri olan Həyat fenomenologiyasının, “canlı ideya” təliminin yaradıcılarından biridir. O, sosial təfəkkür üçün xüsusi toplanma qaydası irəli sürmüş, sistem-struktur təhlil metodunu ilk dəfə elmşünaslığa tətbiq etmiş, elmin qnoseoloji və sosial modellərinin müqayisəsini vermişdir. Görkəmli filosof, həmçinin dünyanın alternativ riyazi modellərini və vektorial zaman konsepsiyasını irəli sürmüşdür.
O, Azərbaycanda və xarici ölkələrdə çap olunan 550-dən artıq elmi əsərin, o cümlədən 39 monoqrafiya və 15 patentin müəllifidir. Alimin rəhbərliyi ilə 5 fəlsəfə doktoru hazırlanmışdır.
S.Xəlilov 1997-ci ildə Rusiya Ekologiya Akademiyasının üzvü seçilmişdir. 1999-cu ildə onun adı Beynəlxalq “Who is who?” ensiklopediyasına daxil edilmiş, 2000-ci ildə Avropa Ali Təhsil Cəmiyyətinin üzvü seçilmişdir.
Alim 2000-ci ildən Amerika Fəlsəfə Assosiasiyasının, 2004-cü ildən Beynəlxalq Hüsserl və Fenomenoloji Tədqiqatlar Cəmiyyətinin, 2009-cu ildən isə Amerika Siyasi Elmlər Assosiasiyası və Avropa Elm Fəlsəfəsi Assosiasiyasının üzvüdür. O, 2003-cü ildən “Fəlsəfə və Sosial-siyasi elmlər” jurnalının baş redaktorudur.
2000-2005-ci illərdə İkinci çağırış Azərbaycan Respulikası Milli Məclisinin deputatı olmuşdur.
S.Xəlilov 2009-cu ildə Mühiyəddin İbn Ərəbi Cəmiyyətinə üzv seçilmişdir. 2010-cu ildən Elm, Mühəndislik və Texnologiya Beynəlxalq Akademiyasının humanitar və sosial elmlər üzrə ekspertidir.
Filosof alim, həmçinin İSESKO-nun İslam Dünyası Universitetləri Federasiyasının təmsilçisi, bir sıra xarici ölkə akademiyalarının üzvü, ABŞ-da təsis olunmuş “Şərq-Qərb: fəlsəfələr arasında körpü” beynəlxalq təşkilatının həmsədridir.
S.Xəlilov 1987-ci ildə “Elmi-texniki tərəqqi: problemlər, perspektivlər” adlı kitabına görə Ümumittifaq “Bilik” Cəmiyyətinin mükafatına, 1992-ci ildə Yusif Məmmədəliyev adına mükafata layiq görülmüşdür.
Alim Azərbaycan Respublikasının ictimai həyatında fəal iştirakına görə 2012-ci ildə “Şöhrət” ordeni ilə təltif edilmişdir.
Görkəmli elm mücahidini 65 illik yubileyi münasibəti ilə təbrik edir, ona möhkəm can sağlığı, ictimai və elmi fəaliyyətində nailiyyətlər arzulayırıq.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.