www.science.az
22.02.2021 13:13

Əlyazmalar İnstitutunda qədim əlyazmaların elektronlaşdırılması işi davam etdirilir

AMEA-nın Məhəmməd Füzuli adına Əlyazmalar İnstitutunda mühafizə olunan qədim əlyazmaların 2014-cü ildən başlayan rəqəmsal formata keçirilməsi işi uğurla davam etdirilir.

Əlyazmalar İnstitutunun fondlarında mühafizə olunan 12000-dən çox ərəbdilli, farsdilli və türkdilli əlyazmaların böyük bir qismi artıq elektronlaşdırılıb. Hazırda 5000-dən çox əlyazma xüsusi skanerlər vasitəsilə elektronlaşdırılaraq institutun elektron kitabxanasının bazasına daxil edilib. Nizami Gəncəvi, Əlişir Nəvai, Məhəmməd Füzuli, İmadəddin Nəsimi, Nəsirəddin Tusi, Əbu Əli ibn Sina kimi böyük Şərq mütəfəkkirlərinin əsərlərinin əlyazmalarının rəqəmsal variantları elektron kitabxanada əksini tapıb.

Ötən ildən etibarən tədqiqatçılar müəssisənin qiraət zalındakı kompüterlər vasitəsilə lokal serverə qoşulub elektron əlyazmaların kataloqu və rəqəmsal surəti ilə tanış ola bilirlər. Yaxın gələcəkdə Əlyazmalar İnstitutunun elektron kataloqunun və elektron kitabxanasının internet üzərindən də oxucuların istifadəsinə verilməsi nəzərdə tutulur. İnstitutun elektron kitabxanasına daxil edilmiş əlyazmaların ilkin kataloqu ilə tanış olmaq istəyənlər aşağıdakı keçidlərdən istifadə edə bilərlər:

- Türkdilli əlyazmaların kataloqu;

- Ərəbdilli əlyazmaların kataloqu;

- Farsdilli əlyazmaların kataloqu.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.