www.science.az
21.02.2020 15:40

Naxçıvan Bölməsində AMEA-nın 75 illik yubileyi qeyd olunacaq

AMEA-nın Naxçıvan Bölməsinin Rəyasət Heyətinin növbəti iclası keçirilib.

Tədbiri giriş sözü ilə açan bölmə sədri, akademik İsmayıl Hacıyev ölkə Prezidenti İlham Əliyevin “Nəriman Nərimanovun 150 illik yubileyinin qeyd edilməsi haqqında” 14 fevral 2020-ci il tarixli Sərəncamını xatırladıb, sözügedən sənəddən irəli gələrək Naxçıvan Bölməsinin qarşısında duran vəzifələrdən danışıb.

Alim, həmçinin AMEA-nın 75 illik yubileyinin bölmədə qeyd edilməsi ilə bağlı Tədbirlər Planının hazırlandığını diqqətə çatdırıb. Bildirib ki, Tədbirlər Planı Rəyasət Heyətinin qərarı ilə təsdiq edilib.

Daha sonra İsmayıl Hacıyev 70 illik yubileyləri münasibətilə Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Hacıfəxrəddin Səfərliyə AMEA-nın, Bioresurslar İnstitutunun laboratoriya müdiri, aqrar elmlər üzrə fəlsəfə doktoru, dosent Sahib Hacıyevə isə Naxçıvan Bölməsinin Fəxri fərmanlarını təqdim edib.

İclasda bölmənin Əlyazmalar Fondunun direktoru, filologiya üzrə elmlər doktoru Fərman Xəlilovun “Əlyazmalar Fondunda qədim əlyazma və çap kitablarının toplanılması və kataloqlaşdırılması işinin təşkili” mövzusunda məruzəsi dinlənilib.

Tədbirdə, həmçinin elmi müəssisələrin bir sıra əməkdaşlarının 2020-ci il üçün tədqiqat planlarının təsdiqi, elmi-təşkilati və cari məsələlərə baxılıb.

Sonda bölmənin Təbii Ehtiyatlar İnstitutunun elmi işçiləri Eltun İbrahimov İqtisadiyyat, Qiyas Qurbanov isə ictimai əsaslarla Coğrafiya şöbələrinə müdir təyin olunublar.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.