Qalay oksihidratın çökmə şəraiti seçilmiş, onun səth qruplarının dissosiasiya sabitləri hesablanmışdır. Bu sorbentlə mis ionlarının sorbsiyası göstərmişdir ki, udulan misin miqdarı stannogelin tərkibindəki hidroksil qruplarının miqdarını 4 dəfə üstələyir. Stannogellə mis-ammiakatın sorbsiyasının kinetik çətinləşməsinin səbəbi aydınlaşdırılmışdır.

     Mg və Ca–fosfatların qurğuşun ionlarına qarşı yüksək sorbsiya tutumları stexiometrik hesablamalar və difraktometrik məlumatlar əsasında təsdiq edilmişdir.

     Təcrübələr əsasən kalsium ortofosfatla aparılmış, mezoməsaməli nümunələrlə müqayisədə makroməsaməli nümunələrin daha yüksək kimyəvi fəallıq göstərdikləri müəyyən olunmuşdur. Bütün hallarda kationun başlanğıc qatılığının artması ilə fosfatların tutumu yüksəlir. Co2+, Ni2+ və Pb2+ ionları ilə kalsium ortofosfatın qarşılıqlı təsirini xarakterizə edən izotermlər məlum tənliklərin heç birinə tabe olmadıqları halda, Cu2+, Zn2+, Cd2+ ionlarının kalsium ortofosfatla udulma izotermləri Lenqmyüə və Freyndlix tənliklərinə tabe olurlar.

     Topokinetik x=1–exp(ktn) tənliyinin köməyilə kinetik təcəübələrin nəticələrinin işlənməsi göstərmişdir ki, əksər hallarda başlanğıc mərhələdə metal ionların sorbentlə udulması yaxşı kristallaşmamış reaksiya məhsulunun prosesdə iştirak etməyə macal tapmamış səth təbəqəsi vasitəsilə sərhədlənir. Xemosorbsiya məhsullarının xassələri və kimyəvi tərkibləri, psevdomorfoz formanın kristallaşma mexanizmi və sürətinin udulan kationun təbiətindən asılı olduğu stexiometrik hesablamalarla və rentgenfaza analizinin nəticələrinə əsasən təsdiq edilmişdir. Reaksiyaların son məhsullarının kristallaşma xüsusiyyətlərinin xemosorbsiyanın dərinliyini və sürətini dəyişməyə qabil həlledici amil olduğu müəyyənləşdirilmişdir.